28.07.16- கல்முனை ஸாஹிரா தேசியக்கல்லூரி உயர்தர தொழில்நுட்ப பீட மாணவர்களின் ” மாணவர் தின விழா..

posted by Habithas Nadaraja

கல்முனை ஸாஹிரா தேசியக்கல்லூரி உயர்தர தொழில்நுட்ப பீட மாணவர்களின் ” மாணவர் தின விழா ” இன்று ( 27) கல்லூரி அதிபர் பீ.எம்.எம்.பதுறுதீன் தலைமையில் கல்லூரி இராவாசல் முதலியார் எம்.எஸ்.காரியப்பர் மண்டபத்தில் இடம்பெற்றது.

பீகாஸ் கெம்பஸ் நிறைவேற்று பணிப்பாளர் பொறியியலாளர் எம்.எம்.அப்துல் றஹ்மான் பிரதம அதிதியாகவும் , பீ.ஸீ.ஈ. நிறுவன தவிசாளர் றிஸாத் சரீப் , அம்பாறை பொது வைத்தியசாலை பல்வைத்திய நிபுணர் டாக்டர் ஏ.அஹமட் வாசில் வாரித் , முன்னாள் கல்லூரி அதிபர் ஏ.எம்.ஹுசைன் ஆகியோர் கௌரவ அதிதிகளாகவும் , கல்லூரி பிரதி அதிபர் எம்.எஸ்.முஹம்மட் விசேட அதிதியாகவும் , உயர்தர தொழில்நுட்ப பீட தலைவர் ஏ.ஆதம்பாவா , உதவி தலைவர் எம்.ஐ.எம்.பஸீல் ஆகியோர் அதிதிகளாகவும் கலந்து கொண்டனர்.

கடந்த வருடம் முதற்தடவையாக நடைபெற்ற க.பொ.த.உயர்தரப் பரீட்சையில் தொழில்நுட்ப துறையில் அம்பாறை மாவட்டத்தில் பொறியியல் தொழில்நுட்ப துறையில் முதன் நிலை பெற்ற , உயிரியல் தொழில்நுட்ப துறையில் முதன்நிலை பெற்ற மாணவர்கள் உள்ளிட்ட தொழில்நுட்ப துறையில் பல்கலைக்கழக அனுமதிபெற்ற 17 மாணவர்களும் , அவர்களுக்கு கற்பித்த ஆசிரிய ஆசிரியைகளும்  , இணைப்பாடவிதான துறையில் திறமைகளை வெளிப்படுத்திய மாணவர்களும் விருது வழங்கி கௌரவிக்கப்பட்டனர்.

பிரதம அதிதி , கௌரவ அதிதிகள் மற்றும் கல்லூரி அதிபர் பீ.எம்.எம்.பதுறுதீன் ஆகியோர் பொன்னாடை போர்த்தி நினைவுச் சின்னம் வழங்கி கௌரவிக்கப்பட்டதுடன் , மாணவர்களின் கலை நிகழ்வுகளும் இடம்பெற்றன.

இக்கல்லூரியில் க.பொ.த.உயர்தரத்தில் ஒவ்வொரு பிரிவிலும் மிகவும் கூடுதலான மாணவர்கள் கல்வி பயில்வதால்  உயர்தர மாணவர் தினத்தை பொதுவாக நடத்த முடியாமையினால்  கலை வர்த்தகப் பிரிவு தனியாகவும் , உயர்தர விஞ்ஞான கணிதப் பிரிவு தனியாகவும் , உயர்தர தொழில்நுட்ப பிரிவு தனியாகவும் நடத்த வேண்டிய நிலையொன்று இவ்வருடம் ஏற்பட்டதாக கல்லூரி அதிபர் பீ.எம்.எம்.பதுறுதீன் தெரிவித்தார்.

( எம்.ஐ.எம்.அஸ்ஹர் , யு.கே.காலித்தீன் , எஸ்.எம்.எம்.றம்ஸான்)












27.07.16- ஸ்ரீலங்கா முஸ்லிம் காங்கிரசின் தலைமை கிழக்கில்தான் இருக்க வேண்டும் என்று தலைவர் அஷ்ரப் ஒரு போதும் கூறவில்லை

posted by Habithas Nadaraja

ஸ்ரீலங்கா முஸ்லிம் காங்கிரஸ் இலங்கை வாழ் முஸ்லிம்களின் குரலாக ஒலிக்க வேண்டும். அதன் மூலம் பாராளுமன்றத்தில் முஸ்லீம்களின் குறைகள், தேவைகள் எடுத்தியம்பப் படவேண்டும், சமூகத்துக்கான ஒரே குரலாக இருக்கவேண்டும் என்ற நன்நோக்கத்திலேயே  ஸ்ரீலங்கா முஸ்லிம் காங்கிரசை ஸ்தாபத் தலைவர் மர்ஹூம் எம்.எச்.எம்.அஷ்ரப் அன்று ஆரம்பித்தார்.

இன்று காலை முதலமைச்சரின் கொழும்புக் காரியாலத்தில் நடைபெற்ற கட்சி முக்கியஸ்தர்களுடனான சந்திப்பின்போதே கிழக்கு மாகாண முதலமைச்சர் ஹாபிஸ் நஸீர் அஹமட் மேற்கண்டவாறு தெரிவித்தார்.

அவர் தொடர்ந்தும் கருத்துத் தெரிவிக்கையில்:

கட்சியின் விரிவாக்கம், மக்கள் கட்சியுடன் கொண்டிருக்கும் பற்று, அதன் வளர்ச்சி போன்றவை சிலருக்கு எரிச்சலூட்டுவதாகவே இன்றைய அவர்களின் இந்த நடவடிக்கை எடுத்துக் காட்டுகிறது. எனவே இப்படியான விசமப் பிரச்சாரங்கள் மக்கள் மத்தியில் ஒருபோதும் எடுபடமாட்டாது. சிலர் இரகசியமாக கட்சிக்குள்ளே இருந்து கொண்டு தலைவருக்கும் கட்சிக்கும் எதிராகச் செயற்பட்டுக்கொண்டிருக்கின்றனர் என்பது தெளிவாகப் புரிகின்றது.

இன்று கிழக்கிற்கு தலைமை வேண்டும், கட்சியின் தலைவர் கிழக்குமாகாணத்தைச் சேர்ந்தவராக இருக்க வேண்டும் என்றெல்லாம் சிலர் கூறிக்கொண்டிருக்கின்றனர். மக்களறியாத சிலருடைய கிழக்கின் எழுச்சி போன்ற சில்லறைத்தனமான அறிக்கைகளும் விசமப் பிரச்சாரங்களுமே இது என்பதில் எந்தவித சந்தேகமுமில்லை. எனவே மக்கள் கட்சியுடனும் தலையுடனும் உறுதியாக இருக்கின்றனர்.

ஆகவே இலங்கையில் உள்ள சகல முஸ்லிம் மக்களுக்காகவும், அவர்களின் பாதுகாப்புக்குரலாகவும், நல்லெண்ணத்தைக் கொண்டு ஆரம்பிக்கப் பட்ட இந்தக் கட்சியை வழி நடாத்த சிறந்த தலைவராக இன்று தலைவர் ரவூப் ஹக்கீம் இருந்து கொண்டிருக்கிறார். எனவே அனைவரும் ஒன்று பட்டு நம்சமூகத்தின் தேவைகளை ஒருமித்த குரலில் கேட்டுப் பெற்று நம் மக்களுக்கான சேவைகளைச் செய்வதில் முன்னிற்க்க வேண்டுமே தவிர ஒவ்வொருவரும் பதவிகளுக்காகப் பிரிந்து சென்று தேசியத் தலைவர்களாகவும், செயலாளர் நாயகங்களாகவும் தங்களுக்குத் தாங்களே நாமங்களைச் சூடி மக்களை திசை திருப்ப நினைப்பதனை யாராலும் ஏற்றுக்கொள்ள முடியாது. எனவே புல்லுருவிகளாக கட்சிக்குள் இருக்கும் சிலர் விரைவில் திருந்தி தலைமைக்குக் கட்டுப் பட்டு கட்சி நடவடிக்கைகளில் தொடர்ந்து பங்காற்றுவார்கள் என்ற நம்பிக்கை எனக்குள்ளது என்று தெரிவித்தார் கட்சியின் பிரதித் தலைவரும் கிழக்கு மாகாண முதலமைச்சருமான ஹாபிஸ் நஸீர் அஹமட். 




27.07.16- அதிகாரிகளும் என்னுடன் இரவு பகல் பாராமல் மிக பக்கபலமாக நிற்கவேண்டும் - சுகாதார அமைச்சர் நஸீர்..

posted by Habithas Nadaraja   [ updated ]

கிழக்கு மாகாணத்திலுள்ள வைத்தியசாலையில் நிலவுகின்ற வைத்தியர்களின் பற்றாக்குறை மற்றும் தாதியர்கள், ஊழியர்களின் பற்றாக்குறைகளை கனிசமான அளவு நிவர்த்தி செய்யப்படும் இதேவேளை வைத்தியசாலையின் முக்கிய குறைபாடுகளையும் இவ்வருட இறுதிக்குள் தீர்த்துவைக்கப்படவுள்ளதாக கிழக்கு மாகாண சுகாதார அமைச்சர் ஏ.எல்.முஹம்மட் நஸீர் கூறினார்.

கிழக்கு மாகாண வைத்தியசாலைகளில் நிலவும் குறைபாடுகளை இல்லாமல் செய்வது தொடர்பாகவும், எதிர்கால அபிவிருத்திகள் பற்றிய உயர் அதிகாரிகளுடனான மீள் ஆய்வு குழுக்கூட்டம் நேற்று (26) மாலை கிழக்கு மாகாண சுகாதார அமைச்சர் ஏ.எல்.முஹம்மட் நஸீர் தலைமையில் திருகோணமலை மாகாண சுகாதார பணிப்பாளர் பணிமனை காரியாலய கேட்போர் கூடத்தில் இடம்பெற்றபோது அவர் மேற்கண்டவாறு கூறினார். 

அவர் அங்கு மேலும் கூறுகையில்,
கிழக்கு மாகாணத்திலுள்ள அம்பாறை, மட்டக்களப்பு மற்றும் திருகோணமலை போன்ற மூன்று மாவட்டங்களிலும் உள்ள வைத்தியசாலைகளில் மிகவும் பின்தங்கிய நிலைமையில் காணப்படுகின்ற வைத்தியசாலைகளின் குறைபாடுகளை முதலில் நிவர்த்தி செய்யப்படுகின்ற இதேவேளை ஏனைய வைத்தியசாலைகளின் ஆளணிப்பற்றாக்குறைகளும் மிக விரைவில் நிவர்த்தி செய்யப்படவுள்ளதாகவும் கூறினார்.

கிழக்கு மாகாணத்தில் மேற்கொண்டு வருகின்ற அபிவிருத்திகள் மற்றும் வைத்தியசாலைகளின் குறைபாடுகளை நிவர்த்தி செய்வதற்கான சகல முன்னெடுப்புக்களும் இடம்பெற்றுவருகின்றது. இதற்கு நீங்களும் பக்க பலமாக நின்று வருகின்றீர்கள். இருந்தும் இந்த செயற்பாடுகளை துரிதப்படுத்த சகல அதிகாரிகளும் என்னுடன் பக்கபலமாக இரவு பகல் பாராமல் நின்று செயற்பட்டால்தான் எமது மாகாணத்திலுள்ள வைத்தியசாலைகளின் குறைபாடுகளை இவ்வருட இறுதிக்குள் ஓரளவு செய்துமுடிக்கலாம். அதற்கான சகல முன்னெடுப்புக்களையும் இன்றிலிருந்து ஆரம்பிக்க நீங்களும் என்னுடன் வாருங்கள்  என்றார்.

மேற்படி மீள் ஆய்வு குழுக்கூட்டத்தில் கிழக்கு மாகாண அமைச்சின் செயலாளர் கே.கருணாகரன், உதவிச் செயலாளர் ஜே.உசைனுடீன், மாகாணப் பணிப்பாளர் வைத்தியர் கே.முருகானந்தன், மாகாண திட்டமிடல் வைத்திய அதிகாரி வைத்தியர் வி.பிரேமானந்தன் மற்றும் கிழக்கு மாகாணத்திலுள்ள பிராந்திய சுகாதார சேவைகளின் பணிப்பாளர்கள், கணக்காளர்கள், தொழில்நுட்ப உத்தியோகத்தர்கள் உள்ளிட்ட பலர் இதில் கலந்துகொண்டனர்.

அபு அலா







 

27.07.16- 150 மில்லியன் ரூபா செலவில் நிர்மாணிக்கப்பட்ட நீதிமன்ற கட்டடத் தொகுதியை திறந்துவைக்க ஜனாதிபதி விஜயம்..

posted by Habithas Nadaraja

முன்னாள் நீதியமைச்சராக றஊப் ஹக்கீமின் 150 மில்லியன் ரூபா நிதி ஒதுக்கீட்டின் கீழ் நிர்மாணிக்கப்பட்ட மூதூர் மாவட்ட நீதவான் நீதி மன்றக் கட்டிடம்  சிறிசேன எதிர்வரும் 29 ஆம் திகதி வெள்ளிக்கிழமை ஜனாதிபதியால் திறந்து வைக்கப்படவுள்ளது.

நீதியமைச்சரும், ஜனாதிபதி சட்டத்தரணியுமான கலாநிதி விஜயதாச ராஜபக்ஸவின் அழைப்பின் பேரில் பிரதியமைச்சர் சட்டத்தரணி எச்.ஆர்.சாரதி துஷ்மத்த மித்ரபாலவின் பங்களிப்புடன் இலங்கை சனநாயக சோஷலிச குடியரசின் ஜனாதிபதி மைத்திரிபால சிறிசேனவினால் மூதூர் மாவட்ட நீதவான் நீதி மன்றக் கட்டிடம் வைபவ ரீதியாக திறந்து வைக்கப்படவுள்ளது.

நிர்மாணிக்கப்பட்ட மூதூர் மாவட்ட நீதவான் நீதி மன்றக் கட்டிடமானது ஸ்ரீலங்கா முஸ்லிம் காங்கிரஸ் தேசிய தலைவரும், அமைச்சருமான ரவூப் ஹக்கீம் நீதியமைச்சராக இருந்தபோது ஒதுக்கீடு செய்யப்பட்ட நிதியில் நிர்மாணிக்கப்பட்டமை குறிப்பிடத்தக்கதாகும்.

மூதூர் மாவட்ட நீதவான் நீதி மன்றக் கட்டிட திறப்பு விழாவில் முக்கிய அரசியல் பிரமுகர்கள், நீதியமைச்சு உயரதிகாரிகள், நீதிபதிகள், சட்டத்தரணிகள், நீதிமன்ற பதிவாளர்கள், நீதிமன்ற உத்தியோகத்தர்கள், அரச உயரதிகாரிகள் என பலர் கலந்து சிறப்பிக்கவுள்ளார்கள்.  

 திருமலையான் 





26.07.16- கிழக்கில் பிரமாண்டமான தனியார் வைத்தியசாலை அமைக்க கிழக்கு முதல்வர் மலேசிய முதல்வருடன் பேச்சு..

posted Jul 26, 2016, 6:31 AM by Habithas Nadaraja

கிழக்கு மாகாணத்தில் சகல வசதிகளையும் கொண்டதான பிரமாண்டமான வைத்தியசாலை ஒன்றினை அமைக்க கிழக்கு மாகாண முதலமைச்சர் ஹாபிஸ் நசீர் அஹமட் விடுத்த கோரிக்கையினை ஏற்றுக்கொண்ட மலேசிய ஜொஹோர் மாணில முதலமைச்சரின் தூதுக் குழு மலேசிய தொழிற்துறை அபிவிருத்தி சிரேஷ்ட பிரதித் தலைவர் அமினுடீன் பின் தவம் தலைமையில் இன்று 26.07.2016 காலை கிழக்கு மாகாண முதலமைச்சர் ஹாபிஸ் நஸீரைச் சந்தித்துப் பேச்சுவார்த்தை நடாத்தினர்.

கிழக்கு மாகாணத்தில் பாரிய சகல வசதிகளையும் ஒருமித்ததான வைத்தியசாலை ஒன்றினை அமைத்து தனியார் துறையில் பட்டங்களை முடித்த பலருக்கு தொழில் வாய்ப்புக்களை வழங்குவதுடன் சகல நோய்களுக்குமான ஒரு சிறந்த வைத்தியசாலையை கிழக்கில் அமைப்பதால் கிழக்கில் பல அசெளகரியங்களுடன் வெளியிடங்களுக்குச் செல்வதனைத் தடுத்து காலடியிலேயே சிறந்த வைத்திய சேவையினை பெறும் வாய்ப்பினையும் கிழக்கு மக்களுக்கு வழங்கலாம் என்ற முதலமைச்சரின் நல்லம் விரைவில் வெற்றியடைய வேண்டும் என்று  மலேசிய ஜொகோன் மாணில தொழிற்துறை அபிவிருத்தி சிரேஷ்ட பிரதித் தலைவர் அமினுடீன் பின் தவம் தெரிவித்தார்.

குறித்த சந்திப்பு கிழக்கு முதலமைச்சரின் கொழும்பு காரியாலயத்தில் இன்று காலை 11 மணிக்கு இடம்பெற்றது குறிப்பிடத்தக்கது.







26.07.16- நிந்தவூர் ஆதார வைத்தியசாலையில் முதல் முறையாக....

posted Jul 25, 2016, 6:28 PM by Habithas Nadaraja   [ updated Jul 25, 2016, 6:32 PM ]

நிந்தவூர் ஆதர வைத்தியசாலையில் முதல் முறையாக மயக்க மருந்து கொத்து "ஹேர்னியா மற்றும் ஹைரேசில். போன்ற இரு சத்திர சிகிச்சைகள் வெற்றிகரமாக 22-07-2016ல் நடைபெற்றது .

இச்சத்திர சிகிச்சையானது நிந்தவூர் ஆதார வைத்தியசாலை வைத்திய நிபுணர்(M.S) திருமதி.எ.ஷகிலா அவர்களின் தலைமையில் Dr. ரவிந்திரன் (சேர்ஜன்) அவர்கள், Dr. றியாஸ், Dr.கபூர் உதவிகளோடு வெற்றிகரமாக மேற்கொள்ளப்பட்டது.

மேலும் இது தொடர்பாக வைத்திய நிபுணர் திருமதி எ.ஷகிலா (M.S) அவர்கள் கூறுகையில் நிந்தவூர் மக்கள் முன்னர் இதுபோன்ற சத்திர சிகிச்சை மேற்கொள்வதாயின் கல்முனை அஷ்ரப் ஞாபகர்த்த வைத்திய சாலைக்கு அல்லது அக்கரைப்பற்று  வைத்தியசாலைக்கு சென்றே இச்சத்திர சிகிச்சை பெறவேண்டியிருந்தது. தற்போது நிந்தவூர் ஆதார வைத்தியசாலையில் இச்சிகிச்சை இடம்பெறுவதற்கு ஏற்பாடுகள் செய்துள்ளோம் வெகு விரைவில் முற்று முழுதாக மயக்க சத்திர சிகிச்சை இங்கு ஆரம்பிக்கபடுமென வைத்திய நிபுணர் மேலும் தெரிவித்துள்ளார். 

நிந்தவூர் ஆதார வைத்தியசாலையில் முதல் முறையாக மயக்க மருந்து கொடுத்து வெற்றிகரமாக ஹேர்னாயா, சத்திர சிகிச்சை இடம்பெற்றமைக்கு பாராளுமன்ற உறுப்பினரும் சுகாதார பிரதி அமைச்சருமான கௌரவ பைசால் காசிம் மற்றும் மாகண சபை உறுபிபானரும் சுகாதார  அமைச்சருமான கௌரவ நசீர் அவர்களும் வைத்தியர்களை பாராட்டி நன்றி தெரிவித்துள்ளனர்.

 
முஹம்மட் ஜெலீல்,
நிந்தவூர்.       








26.07.16- கல்முனை பொலிஸார் ஒழுங்கு செய்திருந்த வீதி போக்குவரத்து மற்றும் பாதுகாப்பு சம்பந்தமான கலந்துரையாடல்..

posted Jul 25, 2016, 6:23 PM by Habithas Nadaraja

கல்முனை பொலிஸார் ஒழுங்கு செய்திருந்த வீதி போக்குவரத்து மற்றும் பாதுகாப்பு சம்பந்தமான கலந்துரையாடலொன்று  இன்று  ( 25 ) கல்முனை இருதயநாதர் கலாசார மண்டபத்தில் இடம்பெற்றது.

கல்முனை பொலிஸ் நிலைய பொறுப்பதகாரி ஏ.டபிள்யு.ஏ.கப்பார் தலைமையில் இடம்பெற்ற மேற்படி கலந்துரையாடலில்  கல்முனை மாநகர ஆணையாளர் , கல்முனை , சவளக்கடை  மற்றும்  சம்மாந்துறை பொலிஸ் பிரிவுகளுக்குட்பட்ட இலங்கை போக்குவரத்து சபை , தனியார் போக்குவரத்து சபை , இலங்கை மின்சாரசபை , வீதி அபிவிருத்தி அதிகார சபை , டெலிகொம் நிறுவனம் , கல்முனை சந்தை நிர்வாக சபை , முச்சக்கரவண்டி உரிமையாளர் சங்கம்  ஆகியவற்றின் பிரதிநிதிகள் , பாடசாலை அதிபர்கள் , சமூக சேவை அமைப்புகளின் பிரதிநிதிகள் , பொலிஸார் ஆகியோர் கலந்து கொண்டனர்.

கல்முனை பிரதான வீதிகளில் பயணிக்கும்  வாகனங்களை கட்டுப்படுத்துதல் , வாகன தரிப்பிடங்களை ஏற்படுத்துதல் , வாகன விபத்துக்களைத் தடுத்தல் , பாடசாலை மாணவர்களை ஏற்றி இறக்குதல் , மஞ்சள் கோட்டு கடவைகளில் பாதசாரிகளின் பாதுகாப்பு தொடர்பான பல்வேறு விடயங்கள் இங்கு கலந்துரையாடப்பட்டன.

( எம்.ஐ.எம்.அஸ்ஹர்)




26.07.16- சகவாழ்வா? இனவாதமா? என்று சிங்கள மக்கள் முடிவு செய்ய வேண்டும் - எதிரணி பாதயாத்திரை பற்றி அமைச்சர் மனோ கணேசன்..

posted Jul 25, 2016, 6:14 PM by Habithas Nadaraja

கூட்டு எதிரணியின் உத்தேச பாதயாத்திரை ஒரு இனவாத யாத்திரை. மேலோட்டமாக அவர்களது கோஷங்கள் எதுவாக இருந்தாலும், அவற்றின் உண்மை  அர்த்தங்கள் வேறானவை.  இனவாதம், மதவாதம், அடிப்படைவாதம், பிரிவினைவாதம், பயங்கரவாதம் ஆகியவையே அவர்களது உண்மை கோஷங்கள். இவற்றை சுமந்துக்கொண்டே அவர்கள் கண்டியில் இருந்து பாதயாத்திரை வர முயல்கிறார்கள்.  சிங்கள மக்களை உசுப்பிவிடவே இந்த இனவாத பாதயாத்திரையின் போது புதிய அரசியலமைப்பு முயற்சிகள், போர்குற்றங்கள் ஆகியவை தொடர்பில் கோஷங்கள் எழுப்பிக்கொண்டு கொழும்பை நோக்கி இவர்கள் வர முயல்கிறார்கள். இதை சிங்கள மக்கள் புரிந்துக்கொள்ள வேண்டும். தமிழ், முஸ்லிம்  மக்களும் புரிந்துக்கொள்ள வேண்டும்.

இந்த இனவாத பாதயாத்திரை சிங்கள சகோதரர்களுக்கு ஒரு  அரிய சந்தர்ப்பத்தை வழங்கியுள்ளது. இனங்கள் மத்தியில் சகவாழ்வை உறுதிப்படுத்தி நாட்டை கடந்த காலபேரழிவில் இருந்து மீட்டு முன்னேறுவோமா அல்லது மீண்டும் கடந்த கால இனவாத பேரழிவுக்குள் விழுந்து நாட்டை அதலபாதாளத்துக்குள் தள்ளுவோமா என்பதை சிங்கள மகாஜனம் முடிவு செய்ய வேண்டும். இந்த இனவாத பாதயாத்திரையை நிராகரிப்பதன் மூலம் தமிழ் மக்களுக்கு நல்ல செய்தியை சிங்கள மக்கள் தர வேண்டும் என தேசிய சகவாழ்வு கலந்துரையாடல் மற்றும் அரசகரும மொழிகள் அமைச்சருமான மனோ கணேசன் தெரிவித்துள்ளார்.

பதுளை ஹாலி-எலவில், ராஜாங்க அமைச்சர் டிலான் பெரேராவினால் நேற்று நடத்தப்பட்ட ‘சகோதரத்தவ விளையாட்டு விழாவில்’ அதிதியாக கலந்துக்கொண்டு சிங்கள மொழியில் உரையாற்றியபோதே  அமைச்சர் மனோ கணேசன் இவ்வாறு தெரிவித்தார். இதன்போது 

அமைச்சர் மேலும் கூறியதாவது,   
2005ம் வருடம் அன்றைய ஜனாதிபதி வேட்பாளர் ரணில் விக்கிரமசிங்கவுக்கு வாக்களிக்க மறுத்த, வடக்கு கிழக்கு தமிழ் மக்கள் 2015ம் வருடம் மைத்திரிபால சிறிசேனவுக்கு வாக்களித்து தாம் ஒரே நாடு என்ற நிலைபாட்டை ஏற்றுக்கொண்டு உள்ளதை பகிரங்கமாக வெளிப்படுத்தி உள்ளார்கள். நமது ஜனாதிபதி, நமது நாடு என்ற அடிப்படையில் இலங்கை தேர்தல் ஆணையாளர் நடத்திய தேர்தலில் பங்கு பற்றி வாக்களித்துள்ளார்கள். தாம் தனி ஒரு நாட்டை நாடவில்லை என்றும், போர் ஆயுதத்தைவிட, வாக்கு சீட்டு என்ற ஆயுதத்தை பயன்படுத்த நாம் தயார் என்றும் அவர்கள் கூறாமல் கூறியுள்ளார்கள். இந்த நல்ல சூழலுக்கு நாடு முழுக்க வாழும் தமிழ் மக்களை கொண்டுவர தமிழ் தேசிய கூட்டமைப்பு, தமிழ் முற்போக்கு கூட்டணி ஆகிய கட்சிகள் முன்னின்று உழைத்துள்ளன. உங்கள் முன் நிற்கும் நான் பதினைந்து வருடங்களாக படாத பாடு பட்டு, நிறைய இழப்புகளை சந்தித்து, தமிழ், சிங்கள, முஸ்லிம் சகவாழ்வுக்காக பாடுபட்டுள்ளேன். இதைவிட வேறென்ன நல்ல செய்தி தமிழ் மக்களிடம் இருந்து, தமிழ் அரசியல் தலைமைகளிடம் இருந்து சிங்கள மக்களுக்கு வேண்டும் என நான் உங்களை கேட்கிறேன்.

தமிழ் மக்களை மனம் வெறுக்க செய்து விடாதீர்கள் என்றும், எங்களை ஏமாற்றிவிடாதீர்கள் என்றும் நான் இந்த மேடையில் இருந்து கோருகிறேன். இனவாத பாதயாத்திரை நடத்த நினைக்கும் மகிந்த ராஜபக்ச குழுவினரை நிராகரித்து எங்கள் கரங்களை பலப்படுத்த வேண்டிய கடமை சிங்கள சகோதரர்களுக்கு இருக்கிறது. இங்கே நண்பர் டிலான் பெரேரா, ‘சகோதரத்தவ விளையாட்டு விழா’ நடத்தி நல்ல காரியம்  செய்துள்ளார். இது எனக்கு ஆச்சரியம் தரவில்லை. ஏனெனில் டிலான், எந்த அணியில் இருந்தாலும் எப்போதும், இனவாதத்துக்கு எதிராகவே இருந்துள்ளார். ரவிராஜையும், லசந்தவையும் கொன்று, என்னை கொல்ல முயற்சிகள் செய்யப்பட்ட போது எனக்கு பல உதவிகளை, இரகசியமாகவும், பகிரங்கமாகவும் செய்தவர், டிலான் பெரேரா. இந்த உண்மையை இங்கே, டிலாலின் தொகுதியில் வைத்து பகிரங்கமாக  கூறாவிட்டால் நான் நன்றி கொன்றவன் ஆகிவிடுவேன்.

சிங்கள இனவாதிகளுக்கு என் மீது கோபம். தமிழ் தரப்பில் இருக்கும் சில இனவாதிகளுக்கும் என்மீது கோபம் இருக்கிறது. இவை பற்றி நான் அலட்டிக்கொள்வதில்லை. எனக்கு சரியென படுவதை நான் எப்போதும் செய்து வந்துள்ளேன். இனியும் அப்படித்தான் இருப்பேன். இன்று இங்கே இந்த விளையாட்டு விழாவில் குழுமியுள்ள தமிழ், சிங்கள, முஸ்லிம் பிள்ளைகளை அழைத்துக்கொண்டு, டிலானுடன் கரங்கோர்த்து, பதுளையில் இருந்து கொழும்புக்கு சகவாழ்வு பாதயாத்திரை செல்ல எனக்கு விருப்பமாக இருக்கிறது. சகவாழ்வுதான் எங்கள் எதிர்காலம். இது குழப்ப முயல வேண்டாம் என கோருகிறேன்.



26.07.16- முன்னாள் வட - கிழக்கு மாகாண சபை உறுப்பினர் அலி உதுமான் நினைவு தினம் நாடு தழுவிய ரீதியில் - மாகாண சபை உறுப்பினர் ஏ.எல்.தவம்..

posted Jul 25, 2016, 6:11 PM by Habithas Nadaraja

முஸ்லிம்களின் தனித்துவ அரசியலுக்காக தன் உயிரையே தியாகம் செய்த ஶ்ரீலங்கா முஸ்லிம் காங்கிரஸ் கட்சியின் முன்னாள் வட – கிழக்கு மாகாண சபை உறுப்பினர் அக்கரைப்பற்றைச் சேர்ந்த மர்ஹூம் அலி உதுமானின் நினைவு நாளான ஆகஸ்ட் 01 ஆம் திகதி நாடு தழுவிய ரீதியான 'வீட்டுக்கு வீடு மரம்' நடும் திட்டத்தை ஶ்ரீலங்கா முஸ்லிம் காங்கிரஸ் ஆரம்பிக்கவுள்ளதாக கிழக்கு மாகாண சபை உறுப்பினர் ஏ.எல்.தவம் இன்று (25) தெரிவித்தார்.

அவர் மேலும் தெரிவிக்கையில்,

மர்ஹூம் அலி உதுமான் கடந்த 1989.08.01 ஆம் திகதி அவரது அக்கரைப்பற்று இல்லத்தில் வைத்து தழிழ் ஆயுதக் குழுவினால் சுட்டுக்கொள்ளப்பட்டார். இவரின் சேவைக்காலத்தில் முஸ்லிம் மக்களுக்கு தமிழ் ஆயுதக் குழுவினர்களினால் ஏற்படும் சமூகப் பிரச்சினை, ஆள்கடத்தல், வர்த்தக நிலையங்களை கொள்ளையடித்தல் போன்ற பல பிரச்சினைகளுக்கு முகம்கொடுத்து முன்நின்று செயற்பட்டவராவார். இவ்விடயங்களில் தலைபோடக்கூடாது என்று பல எச்சரிக்கைகளை தழிழ் ஆயுதக் குழுவினர் விடுத்தும் விடுத்திருந்தனர். 

இதனை பொறுப்படுத்தாத அவர் அட்டாளைச்சேனை, அக்கரைப்பற்று போன்ற பல பிரதேசங்களில் 1988 தொடக்கம் 1989 ஆண்டுவரையில் இடம்பெற்ற ஆள்கடத்தல் விடயங்களிலும் தலையிட்டு வந்தார்.

இதேவேளை வட - கிழக்கு மாகாணசபை உறுப்பினர்களாக இருந்துவந்த 3 முஸ்லிம் காங்கிரஸ் உறுப்பினர்களில் இவர் மட்டும்தான் முன்நின்று எந்த தழிழ் ஆயுதக் குழுவினர்களுக்கும் பயப்படாமலும், அவர்களின் எச்சரிக்கைகளை பொறுட்படுத்தாமலும் மிக துணிச்சலாக செயற்பட்டும் வந்தார். இதன் காரணமாகவே தழிழ் ஆயுதக் குழுவினரால் அவர் சுட்டுக்கொல்லப்பட்டார்.

இவர் அக்கரைப்பற்று மத்திய கல்லூரியில் சிறந்ததொரு ஆங்கில ஆசிரியராகவும், ஒழுக்கவியல் விடயங்களுக்கு பொறுப்பானவராகவும் செயற்பட்டவராவார். இவரின் மகனும் விஞ்ஞானத்துறையில் 6 தங்கப் பதக்கங்களைப் பெற்று தேசிய ரீதியாக பல சாதனைகளைப் படைத்து முஸ்லிம் சமூகத்துக்கு பெருமை சேர்த்துக்கொடுத்தவராவார் என்றும் கிழக்கு மாகாண சபை உறுப்பினர் ஏ.எல்.தவம் தெரிவித்தார்.
அபு அலா 


 

26.07.16- நாட்டின் பொருளாதாரத்தை மேம்படுத்த வேண்டுமானால் நாடு, மக்கள், வளங்கள் பாதுகாப்பாக இருக்கவேண்ம் - பாராளுமன்ற உறுப்பினர் மன்சுர்..

posted Jul 25, 2016, 6:09 PM by Habithas Nadaraja

"நாட்டினுடைய பொருளாதாரத்தை மேம்படுத்த வேண்டுமானால் நாடு, மக்கள், வளங்கள் பாதுகாப்பாக இருக்கவேண்டியது அவசியமானதொன்றாகும் என்று அம்பாறை மாவட்ட பாராளுமன்ற உறுப்பினர் எம்.ஐ.எம்.மன்சூர் பாராளுமன்றத்தில் காட்டமாக உரையாற்றினார்.

நாட்டின் பொருளாதாரத்தை மேம்படுத்த வேண்டும் என்ற தலைப்பில் பாராளுமன்ற உறுப்பினர் தினேஷ் குணவர்த்தன நேற்று முன்தினம் சமர்ப்பிக்கப்பட்ட ஒத்திவைக்கப்பட்ட விவாத வேளையின்போது அம்பாறை மாவட்ட பாராளுமன்ற உறுப்பினர் எம்.ஐ.எம்.மன்சூர்  மேற்கண்டவாறு உரையாற்றினார்.

அம்பாறை மாவட்டத்தை பொறுத்தளவில் கடந்த ஆட்சியின் போது திட்டமிட்ட முறையில் தமிழ், முஸ்லிம் மக்களுக்குரிய உரித்தான காணிகளின் உரிமைப்பத்திரங்களை கொண்டிருந்த போதும் பல்லாயிரக்கணக்கான ஏக்கர் காணிகளில் விவசாயம் செய்ய விடாமல் தடுத்த ஒரு நிலைமை காணப்பட்டு வந்தது. அவ்வாறானதொரு நிலைமை இந்த ஆட்சியின் போதும், நல்லாட்சியின் போதும், தேசிய அரசாங்கத்தின் ஆட்சியிலும் நீடிப்பதானது அனுமதிக்க முடியாத ஒரு விடயமாகும்.

அங்கு அவர் மேலும் உரையாற்றுகையில்,


இந்த அரசாங்கத்தின் நல்லாட்சியில் அவசரமாக அம்பாறை மாவட்டத்திலேயே இருக்கின்ற சகல காணிப்பிரச்சினைகளையும் தீர்த்து வைப்பதன் மூலமாக அந்த காணிப்பிரச்சினைகளால் பாதிக்கப்பட்டு இருக்கின்ற விவசாயிகளுக்கு நிவாரணத்தை வழங்குவதால், நாட்டினுடைய உணவு உற்பத்தியிலும் கணிசமான தாக்கத்தை ஏற்படுத்த முடியுமென நான் கருதுகின்றேன்".
அதே போன்றுதான் கடந்த அரசாங்கத்தின் ஆட்சிக்காலத்திலும் எவ்விதமான ஆக்கபூர்வமான நடவடிக்கையும் எடுக்கப்படாத காரணத்தினால் ஒலுவில் பிரதேசமானது மிகவும் மோசமான கடலரிப்புக்கு உள்ளான சம்பவமும் இடம்பெற்றது. தற்போது இந்த ஒலுவில் கடலரிப்பானது படு மோசமான தாக்கத்தை ஏற்படுத்தியதாக காணப்படுகின்றது. கடலரிப்பினால் ஏற்பட்ட தாக்கமென்பது நடந்தேறிய தாக்கமல்ல.

ஒவ்வொரு நாளும் ஒவ்வொரு கணமும் பல தென்னந்தோப்புக்களும், மக்கள் குடியிருப்புகளும், துறைமுகத்துக்கு சொந்தமான கட்டிடங்களும் கடலரிப்புக்குள்ளாகி படிப்படியாக நிலங்களை கடல் ஆக்கிரமித்துக் கொண்டிருக்கின்றது. மீனவர்கள் தங்கள் வாழ்வாதாரமாக கொண்டிருந்த மீனவ தொழிலை மேற்கொள்ள முடியாதவர்களாக சொல்லென துயரங்களை அனுபவித்துக் கொண்டிருக்கின்றார்கள். பல மீனவர்கள் தொழிலை கைவிட்டு விரக்தியடைந்து உள்ளார்கள்.

மேலும் மீனவர்கள் தற்காலிகமாக அமைத்த தங்குமிடங்கள் கடலரிப்பினால் கழுவப்பட்டு போகின்ற நிலைமை நீடித்து வருகின்றது. மீண்டும் மீண்டும் மீனவர்கள் கூடாரங்களை நிமாணித்த போதும் அவைகளும் நீரினால் அடித்துச் சொல்லப்படுகின்ற நிலையே காணப்படுகின்றமை பரிதாபகரமாக உள்ளது. அதேபோல் பல்வேறு குடியிருப்பு காணிகளிலுள்ள மக்கள் வாழுகின்ற வீடுகளை கூட இழக்கின்ற சூழலே இந்த கடலரிப்பினால் ஏற்பட்டுள்ளதை கவலையோடு சுட்டி காட்டுகின்றேன்.

ஆகவேதான் இந்த விடயங்கள் தொடர்பாக கடந்த அரசாங்கம் பாராமுகமாக இருந்தாலும், இந்த அரசாங்கத்தில் நல்லாட்சியென பெருமைப்பட்டு பேசுகின்ற ஒரு ஆட்சியிலே தொடர்ந்தும் இவ்வாறான நிலைமை நீடிப்பதை அனுமதிக்காமல் இப்பிரச்சினைகளுக்கு தகுந்த ஏற்பாடுகளை செய்தேயாக வேண்டும். ஒலுவில் கடலரிப்பினால் காணிகளை சொத்துக்களை இழந்த மக்களுக்கு, தொழிலை இழந்த மீனவர்களுக்கு நஷ்டஈடுகளை வழங்குவதோடு மிக அவசரமாக இந்த கடலரிப்புக்கு உள்ளாகின்றமையை தடுத்து அதற்கான தகுந்த மாற்று ஏற்பாடுகளுடன் கூடிய நடவடிக்கைகளை செய்தேயாக வேண்டும் என கேட்டுக் கொள்கின்றேன்.

மேலும் கரையோர பாதுகாப்பு திணைக்களம் இந்த விடயத்தில் என்ன ஆக்கபூர்வமான நடவடிக்கைகளை மேற்கொண்டுள்ளது என்பதை கேட்க வேண்டிய அவசியம் எழுந்திருக்கின்றது. ஆகவே சம்பந்தப்பட்ட கரையோர பாதுகாப்பு திணைக்களம் மிக அவசரமாக ஒலுவில் கிராமத்தை பாதுகாக்கின்ற நடவடிக்கைகளை உடனடியாக மேற்கொள்ள வேண்டும்.

ஒலுவில் பிரதேசத்தை பாதுகாப்பது எமது நாட்டை பாதுகாப்பது போன்றதாகும். எங்கோ ஒரு மூலையில் ஒலுவில் பாதிக்கப்படுகின்றது என்பதற்காக பாராமுகமாக இருந்தால் நாட்டினுடைய நிலவளம் இல்லாமல் போய் நாட்டின் அழகான வடிவமானது மாறுபட்டு மிக மோசமான நிலைக்கு தள்ளப்படும் வாய்ப்பிருக்கின்றது. ஆகவே சம்பந்தப்பட்ட திணைக்களம் ஒலுவில் கடலரிப்பு சம்பந்தமாக மிக அவசரமாக தடுப்பு நடவடிக்கைகளை மேற்கொள்வதோடு, பாதிக்கப்பட்ட ஒலுவில் மக்களுக்கு போதுமான நிவாரணத்தையும் பெற்றுக்கொடுக்க முன்வர வேண்டும்.
திரு மலையான் 



1-10 of 4273